Ağ Ev bildirib ki, iranlılar Krımda İran pilotsuz uçan aparatları ilə Ukraynanı hədəfə almaqda ruslara kömək ediblər və bu səbəbdən də ABŞ, İranın nüvə sazişinə qayıtması ilə bağlı danışıqlar aparmaq səylərini kənara qoyur.
Hafta.az-ın yazdığına görə, Ağ Evin Milli Təhlükəsizlik Şurasının sözçüsü Con Kirbi jurnalistlərə deyib ki, Krımdan uzaqdan fəaliyyət göstərən Rusiya hərbçiləri son günlər Kiyev də daxil olmaqla Ukrayna hədəflərinə hücumlar etmək üçün İran pilotsuz təyyarələrindən istifadə ediblər.
“Biz əminik ki, İran hərbçiləri Krımda döyüşə hazırdır və bu əməliyyatlarda Rusiyaya kömək edir”, - Kirbi bildirib.
Tehrandan ABŞ-ın iddialarına səssiz qalıb. Rusiyanın müdafiə və xarici işlər nazirlikləri də şərh tələblərinə cavab verməyib.
Bu bəyanat sentyabrda Tehranda “uyğun olmayan geyiminə” görə həbs edilən Mahsa Amininin həbsdə ölməsindən sonra prezident Co Bayden tərəfindən etirazçılara qarşı repressiyaları qınadığı İranla ABŞ arasında yeni gərginlik nöqtəsinə işarə edir.
Kirbi qeyd edib ki, indiki məqamda ABŞ-ın İranın 2015-ci ildə imzaladığı nüvə sazişinə qayıtması ilə bağlı Tehranla danışıqları davam etdirməsinə ehtiyac yoxdur.
Kirbinin sözlərinə görə, ABŞ indi Rusiyanın Ukraynaya qarşı istifadə etmək üçün İrandan yer-yer raketləri kimi qabaqcıl adi silahlar almağa cəhd edə biləcəyindən narahatdır.
Birləşmiş Ştatların İranın Rusiyaya silah-sursat tədarükünü “ifşa etmək, çəkindirmək və buna qarşı çıxmaq” üçün əlavə sanksiyalar da daxil olmaqla istənilən kursu davam etdirəcəyini deyən Kirbi əlavə edib ki, İran və Rusiya dünyaya yalan danışa bilər, lakin həqiqəti gizlədə bilməzlər. Həqiqət isə budur ki, Tehran indi birbaşa müharibəyə qoşulur.
BU arada, ABŞ Dövlət Departamentinin sözçüsü Ned Prays da verdiyi açıqlamada, ABŞ-ın İran hərbçilərinin Krımda Rusiya ordusuna Tehran tərəfindən təmin edilən pilotsuz uçuş aparatlarından istifadə etməkdə kömək etdiyini müəyyən etdiyini bildirib.
“Biz təsdiq edə bilərik ki, Krımda olan Rusiya hərbi qulluqçuları İranın PUA-larından istifadə edib və onlardan son günlər Ukrayna ərazisində kinetik hücumlar, o cümlədən Kiyevə hücumlar həyata keçirmək üçün istifadə ediblər”, – Prays deyib.
